№3 Қалалық емхана мамандары Медико-техникалық колледжде өткен ата-аналар жиналысына қатысты. Мұндай кездесулер медицина қызметкерлері мен студенттердің ата-аналары арасында сенімді қарым-қатынас орнатуға, сондай-ақ денсаулыққа қатысты өзекті мәселелер бойынша ақпараттандыруға мүмкіндік береді.

Жиналыс барысында дәрігерлер халықты медициналық ұйымдарға тіркеу тақырыбын егжей-тегжейлі түсіндірді. Тіркеу алғашқы медициналық-санитарлық көмектің қолжетімділігін қамтамасыз етіп, профилактикалық тексерулер мен уақтылы ем алуға жол ашады. Ата-аналарға тіркеу тәртібі мен қажетті құжаттар жөнінде ақпарат берілді.

Сонымен қатар, дәрігерлер Міндетті әлеуметтік медициналық сақтандыру (МӘМС) жүйесінің артықшылықтарына тоқталды. МӘМС қатысушылары кең көлемді медициналық қызметтерге, тар бейінді мамандарға, заманауи диагностика мен емдеуге қол жеткізе алатыны атап өтілді.

Кездесуде тағы бір маңызды тақырып – жедел респираторлық вирустық инфекциялар (ЖРВИ) мен тұмаудың алдын алу болды. Ата-аналарға қарапайым, бірақ маңызды ережелер еске салынды: қолды жиі жуу, жеке гигиена сақтау, маусымдық аурулар кезінде екпе алу, дұрыс ұйқы және салауатты тамақтану. Тұмауға қарсы вакцинацияның аурудың ауыр өтуі мен асқынуларының алдын алудың ең тиімді тәсілдерінің бірі екені ерекше атап өтілді.

Мұндай кездесулер ата-аналарды ақпараттандырумен қатар, өз денсаулығына және жақындарының саулығына жауапкершілікпен қарауға ықпал етеді.