№3 Қалалық емханада аурудың алдын алу мен жастардың өз денсаулығына жауапкершілікпен қарауына ерекше көңіл бөлінеді. Әйел денсаулығы апталығы аясында ЖДО «Жас Толқын» мамандары Көлік және коммуникация жоғары колледжінің 2 курс студенттеріне арналған «Денсаулық қалашығы» іс-шарасын ұйымдастырды.

Акцияның негізгі мақсаты – студенттердің репродуктивті денсаулықты сақтау, әйелдер арасында жиі кездесетін аурулардың алдын алу, сондай-ақ жастайынан өзін-өзі күту мәдениетін қалыптастыру.

Іс-шара барысында студенттер мамандардан әйел денсаулығына қатысты сұрақтарға жауап алды, гинекологиялық аурулардың алдын алу жолдарын, дұрыс тамақтанудың рөлін, дене белсенділігінің маңызын және дәрігерге жүйелі түрде қаралу қажеттігін білді.

Әсіресе, әйелдер арасында жиі кездесетін ауруларды ерте анықтау мен алдын алу мәселесіне ерекше назар аударылды. Дәрігерлер уақытылы медициналық көмекке жүгінудің маңыздылығын түсіндірді.

«Денсаулық қалашығы» интерактивті форматта өтті: студенттер өз сұрақтарын қойып, викториналарға қатысты және ақпараттық-білім беру материалдарын алды.

Осындай шаралар жастардың денсаулық құндылығын жақсырақ түсінуіне және өз болашағына жауапкершілікпен қарауына ықпал етеді.

№3 Қалалық емхана алдағы уақытта да халық денсаулығын нығайтуға және салауатты өмір салтын насихаттауға бағытталған профилактикалық іс-шараларды жалғастырады.