№3 Қалалық емханада ашық есік күні: МӘМС және ЖЖА-ның алдын алу№3 Қалалық емханада міндетті әлеуметтік медициналық сақтандыру (МӘМС) және жүрек-қан тамырлары ауруларының (ЖЖА) алдын алу тақырыбына арналған ашық есік күні өткізілді. Іс-шараның негізгі мақсаты – халықтың медициналық қызметтер туралы хабардарлығын арттыру және денсаулыққа жауапкершілікпен қарау мәдениетін қалыптастыру.Ашық есік күні аясында емхана мамандары МӘМС жүйесіне қатысты семинар ұйымдастырды. Қатысушылар сақтандырудың негізгі қағидалары, мемлекет жарнаны төлейтін әлеуметтік санаттар, сондай-ақ 2025–2026 жылдардағы жаңа өзгерістер туралы ақпарат алды. Сонымен бірге МӘМС аясында сақтандырылған және сақтандырылмаған азаматтарға көрсетілетін кепілді медициналық көмек көлемі жан-жақты түсіндірілді.Жеке семинар жүрек-қан тамырлары ауруларының алдын алуға арналды. Дәрігерлер аурулардың даму қаупін арттыратын факторларға тоқталды: дұрыс тамақтанбау, қозғалыстың аздығы, күйзеліс, темекі шегу және алкогольді шамадан тыс қолдану. Маман пікірінше, қан қысымын, қант пен холестерин деңгейін тұрақты бақылап отыру – асқынулардың алдын алудың сенімді жолы.Қызықты сәттердің бірі «Сау жүрек» атты викторина болды. Оған «ҚазАтомПром» компаниясының қызметкерлері белсенді қатысты. Олар жүрек саулығы, дұрыс тамақтану, дене белсенділігінің пайдасы және зиянды әдеттердің алдын алу жөніндегі сұрақтарға жауап берді. Дұрыс жауап бергендерге естелік сыйлықтар мен пайдалы ақпарат жазылған жадынамалар табысталды.Мұндай шаралар халыққа маңызды медициналық ақпаратты жеткізіп қана қоймай, оларды өз денсаулығына көңіл бөлуге ынталандырады. №3 Қалалық емхана азаматтардың денсаулығын нығайтуға және профилактика мәдениетін қалыптастыруға бағытталған жұмыстарды жалғастыра береді.