Жаз — демалыстың, саяхаттың, жеміс-жидек пен көкөністің мол кезі. Бірақ дәл осы маусымда ішек инфекцияларының таралу қаупі артады. Жоғары температура тағамдар мен суда бактериялардың тез көбеюіне жағдай жасайды, соның салдарынан улану және жұқпалы аурулар жиі кездеседі.

Ішек инфекциясы дегеніміз не?

Ішек инфекциялары — асқазан-ішек жолын зақымдайтын аурулар тобы. Оларды бактериялар, вирустар немесе паразиттер қоздырады. Негізгі белгілері:

• іштің ауруы;

• жүрек айнуы, құсу;

• сұйық іш өту;

• дене қызуының көтерілуі;

• әлсіздік, сусыздану.

Алдын алу шаралары:

Қол гигиенасын сақтау

Тамақ ішер алдында, дәретханадан кейін, көшеден келген соң және жануарлармен байланыста болғанда қолды сабынмен мұқият жуу қажет. Бұл қарапайым әдет инфекцияның алдын алуда өте маңызды.

Таза суды пайдалану

Шикі суды ішпеңіз. Ішуге және ас дайындауға қайнатылған немесе бөтелкедегі суды қолданыңыз.

Жеміс-жидек пен көкөністі мұқият жуу

Жегенге дейін оларды қайнаған сумен шаю керек. Әсіресе қабығымен жейтін жемістерге ерекше назар аударыңыз.

Өнімдердің сапасын бақылау

Дайын тағамды тоңазытқышсыз ұзақ сақтамаңыз. Жол бойында немесе санитарлық талаптары сақталмаған жерден өнім сатып алмаңыз. Мерзімі өткен тағамды қолданбаңыз.

Тамақты дұрыс дайындау

Ет, балық, жұмыртқа толық пісіріліп, термиялық өңдеуден өтуі тиіс. Шикі және дайын өнімдерді бөлек сақтаңыз.

Сүт өнімдері мен балмұздаққа сақ болыңыз

Жазда уланудың басты себептерінің бірі осы өнімдер болып табылады.

Есте сақтаңыз: ішек инфекциясының белгілері байқалса, өз бетіңізше емделмеңіз. Міндетті түрде дәрігерге жүгініңіз. Әсіресе балалар мен қарттар үшін бұл ауру өте қауіпті, себебі сусыздану тез дамиды.

Денсаулық сақтау — өз қолыңызда. Жазды көңілді әрі қауіпсіз өткізу үшін қарапайым ережелерді ұмытпаңыз!