Туберкулез — Mycobacterium tuberculosis немесе Кох таяқшасы деп аталатын бактериядан туындайтын жұқпалы ауру. Көбіне ол өкпені зақымдайды, бірақ бүйрекке, сүйекке, буындарға, лимфа бездеріне де таралуы мүмкін.

Бүгінде туберкулез әлем бойынша ең кең таралған инфекциялардың бірі болып отыр. Әр адам бұл ауруға шалдығуы мүмкін, алайда дер кезінде анықтап, ем қабылдаса, толық айығып, қалыпты өмір сүруге болады.

Туберкулез қалай жұғады?

Негізгі жұғу жолы — ауа-тамшы арқылы. Жөтелгенде, түшкіргенде немесе сөйлегенде науқас адам бактерияларды ауаға шығарады, оны қасындағылар жұқтырып алуы мүмкін. Әсіресе ұзақ уақыт бір бөлмеде болу қауіпті.

Өкпе туберкулезінің негізгі белгілері:

• 2–3 аптадан ұзақ созылған жөтел, кейде қақырықпен немесе қанмен;

• дене қызуының көтерілуі (көбіне 37–37,5 °C шамасында);

• түнде қатты терлеу;

• тәбеттің төмендеуі, салмақ тастау;

• тез шаршау, әлсіздік;

• демікпе, кеуденің ауыруы.

Бұл белгілер әрқашан тек туберкулезді білдірмейді. Дегенмен, осындай жағдай байқалса, дәрігерге қаралып, тексеруден өту қажет: флюорография, талдаулар, арнайы сынамалар.

Ауруды ерте анықтау не үшін маңызды?

Туберкулездің бастапқы кезеңінде емдеу нәтижелі болады. Қазіргі заманғы дәрі-дәрмектер мен бақылау бағдарламалары ауруды толық емдеуге мүмкіндік береді. Ал егер белгілерге мән бермей жүре берсе, ауру асқынып, тек науқастың өзіне емес, айналасындағыларға да қауіпті болуы мүмкін.

Денсаулығыңызға қамқор болыңыз: флюорографиядан уақытылы өтіңіз, иммунитетті күшейтіңіз, дұрыс тамақтаныңыз және күдікті белгілер байқалса, дәрігерге қаралыңыз.