1 қыркүйек – Білім күні қарсаңында №3 Қалалық емханада ерекше мереке өтті. Бұл жолы шараға емхана қызметкерлерінің алғаш мектеп табалдырығын аттайтын бүлдіршіндері қатысты. Іс-шараны профилактика бөлімі мен Пациенттерді қолдау қызметі ЖДО «Жас Толқын» бірлесіп ұйымдастырды.

Балалар үшін дайындалған сыйлық сертификаттары мен тәтті сыйлықтарды кәсіподақ ұйымы табыстады. Мұндай қамқорлық пен көңіл бөлу бүлдіршіндерге қуаныш сыйлап қана қоймай, ата-аналарына да үлкен қолдау болды.

Мерекелік бағдарлама барысында кішкентай өнерпаздар ән айтып, би билеп, музыкалық нөмірлер орындады. Олардың өнері көрермендерге шаттық пен жылулық сыйлады. Іс-шара достық пен қуанышқа толы отбасылық атмосферада өтті.

Білім күні – тек оқушылар үшін ғана емес, барша халық үшін маңызды мереке. Өйткені білім – болашақтың іргетасы, ал дәстүрге айналған осындай іс-шаралар біздің ұжымымызды одан әрі жақындастыра түседі.

Барлық бірінші сынып оқушыларын жаңа оқу жылымен шын жүректен құттықтаймыз! Білім жолдарың сәтті, ал мектеп жылдары қуаныш пен қызыққа толы болсын!