№3 Қалалық емхананың алдын алу және әлеуметтік-психологиялық көмек бөлімінің меңгерушісі «КАР Logistics» ЖШС қызметкерлеріне арналған «Дәрі-дәрмектер туралы барлығы» тақырыбында семинар өткізді.

Семинар барысында дәрі-дәрмектерді дұрыс қабылдау, сақтау және үй жағдайында қауіпсіз түрде жою мәселелері қозғалды. Қызметкерлерге дәріні нұсқаулыққа сай қабылдау – емнің тиімділігі мен қауіпсіздігінің кепілі екені түсіндірілді. Яғни, мөлшерін, қабылдау уақытын және ұзақтығын сақтау өте маңызды.

Сонымен қатар, семинарда дәрілік заттарды өз бетінше қабылдаудың қаупі, антибиотиктерді негізсіз қолдану салдары мен дәрілік өзара әрекеттестік тақырыптары да талқыланды. Рационалды қолданудың негізгі қағидалары – тек дәрігердің тағайындауымен қабылдау, қажеттілікке қарай қолдану және курсты толық аяқтау.

Дәрілерді дұрыс сақтау – олардың сапасы мен тиімділігін сақтаудың басты шарты. Мысалы, кейбір дәрілерді тоңазытқышта сақтау қажет, ал басқаларын құрғақ, салқын жерде ұстау керек. Ал мерзімі өткен дәрілерді лақтыру емес, арнайы жою ережелерін сақтау керек – бұл қоршаған орта мен денсаулық үшін маңызды.

Қатысушылар өздерін қызықтырған сұрақтарын қойып, толық жауап алды. Семинар медициналық сауаттылықты арттыруға бағытталған тиімді қадам болды.