Күн соққысы мен жылу соққысы: екеуі бірдей ме?

Жаз – демалыс, серуен, ашық аспан. Бірақ күннің астында немесе ыстық жерде ұзақ болу денсаулыққа кері әсерін тигізуі мүмкін.

Жастар арасында жылу мен күн соққысын шатастыратындар көп.

Айырмашылығы неде?

Күн соққысы – күн сәулесінің тікелей басқа түсуінен болады. Күннен қорғанбау (бас киімсіз жүру) мидың қызып кетуіне себеп болады.

Жылу соққысы – ағзаның жалпы қызып кетуі. Бұл көбіне ыстық, желдетілмейтін, ылғалды жерлерде, тіпті көлеңкеде де болуы мүмкін.

Екі жағдайда да белгілері ұқсас:

– Басың айналады, ауырады

– Тыныс алуың жиілейді

– Тері қызарып, құрғайды

– Қан қысымы түсіп, естен тану қаупі бар

Қалай алдын алуға болады?

Күннен қорғайтын бас киім кию

Су ішуді ұмытпау

Жабық, тар жерлерден аулақ болу

Жеңіл, мақта матадан тігілген киім кию

Спортпен айналысқанда демалысқа уақыт бөлу

Егер өзіңде немесе айналаңдағыларда осындай белгілер байқалса – көлеңкеге апарып, су беріп, жедел жәрдем шақыру қажет.

Жастар белсенді. Бірақ белсенділік пен денсаулық қатар жүруі керек.

Күннің қызығымен қоса, денеңді де сақта!