Елорда колледждерінің бірінде өткен конференцияда деструктивті мінез-құлықтың алдын алудың және жасөспірімдердің қауіпсіз өмір салты мәдениетін қалыптастырудың өзекті мәселелері талқыланды. Оқушылар мен студенттердің тұлғааралық қарым-қатынасына, қауіпсіз білім беру ортасын құруға, нашақорлық пен суицидтік мінез-құлықтың алдын алуға, сондай-ақ психологиялық жарақаттарды жоюға қатысты маңызды мәселелер қозғалды.

Қонақтар ретінде елордалық сарапшылар шақырылды: есірткі қылмысына қарсы іс-қимыл басқармасының бөлім бастығы, психологиялық сүйемелдеу бөлімінің басшысы, психолог-суицидолог, дәрігер эпидемиолог және басқалар. Іс-шара аясында спикерлер аталған мәселелерді шешу бойынша өз тәжірибелерімен және білімдерімен бөлісті.

Мұнда алдын алу және психологиялық қолдау саласындағы жетістіктер, бірлескен іс-шаралар және еріктілермен жұмыс атап өтілді. Ең жақсыларына алғыс хаттар мен гүлдер табысталды.

Жалпы, конференция тәжірибе алмасуға, өзекті мәселелерді талқылауға және оларды шешу жолдарын іздеуге арналған алаңға айналды. Қатысушылар жастардың алдын алу және қолдау саласында одан әрі жұмыс істеу үшін құнды білім мен шабыт алды.